Evento:
Presentación d'os cursos d'Aragonés 2025-2026
Embedded Files
UN ATRO AÑO MÉS, OS CURSOS D’ARAGONÉS EN BARCELONA
O pasato diya martis 14 d’octubre se presentoron en a Universitat de Barcelona os cursos d’aragonés organizatos per o Centro Aragonés de Barcelona e a Colla de Charradors O Corrinche.
Ya son cuasi tres decadas, 28 años, impartindo os cursos d’aragonés, fendo buena faina ta amostrar l’aragonés entre os aragoneses que residen en Barcelona e os suyos familiars, fillos, nietos, intresatos en l’aragonés... Istos cursos han tenito mayestros ilustres como ye o caso d’Anchel Conte, entre atros, e por ers han pasato més de 200 escolanos.
De primeras, charró Jesús Félez en nombre d’o Centro Aragonés de Barcelona, que esfendió l’amostranza d’a luenga aragonesa en un mundo pleno de bulos an se discuten mesmo os feitos empiricos comprebatos, e dió ro refirme d’o Centro Aragonés de Barcelona, que preside, a os cursos d’aragonés.
Dimpués, prenió a parola Enrique Gargallo, catedratico de filolochía en a Universitat de Barcelona, que presentó a os rechiradors de l’aragonés, Fernando Romanos e Chabier Tierz, plegatos dende Zaragoza con o suyo libro, “Diccionario de fraseolochía basica de l’aragonés”. En opinión d’o profesor Gargallo, que ha prelogato ro libro, as frases feitas e as mazadas son parti d’a cultura popular e d’a cultura en cheneral e cal estudiar-las ta que no se tresbatan.
Contino, fabloron Romanos e Tierz ta presentar o suyo libro. Comentoron que os dos teneban fan tiempos per deseparato un Excel an reculliban as frases feitas d’as que iban tenendo conoximiento. En 2019, antis de l’astro, se metioron a triballar de conchunta ta fer un libro de fraseolochía an bi ha més de dos mil dentradas, con exemplos, puesto d’orichen, significatos d’as frases feitas e muitas cosas más. Afirmoron que sosprendeba que muitas d’eras yeran prou cheneralizatas en tot Aragón; en resumen, un sobrebuén e meticuloso triballo que enampla os estudios sobre a nuestra luenga en o suyo cambo. O libro ye estato publicato per Edicions Transiberiano en 2025.
Santiago Moreno, que preside o Corrinche dende chulio d’iste año, compartió ro suyo goyo perque iste año ro Corriche fa 15 añadas e animó a toz a apuntar-se a os cursos. Manifestó en parolas suyas, que femos de toz, que “L’aragonés no ye sólo una luenga. Ye un modo de mirar o mundo, un patrimonio cultural, una forma de sentir y de nombrar o que somos”.
En zagueras, fabloron a o numbroso publico que bi eba, entre qui se trobaban muitos escolanos, os profesors d’os cursos ya fa bels años, Miguel Vidal, profesor d’aragonés I, e Alberto Lamora, profesor d’aragonés II. Charroron d’emplegar en os cursos una metodolochía prautica, alentando a fer a parola ta prauticar a luenga, a o mesmo tiempo que s’alquieren os conoximientos d’a luenga aragonesa achustatos a o Marco Europeyo d’as Luengas. Ta ixo se contará con firmes recursos didauticos en paper y en linia. O libro de leutura d’iste curso estará o zaguer libro de Juan Carlos Marco Pueo “Sobretot no tomar mal”, escrito en aragonés ribagorzano, tot un best-seller en un mundo de l’aragonés. Os cursos encomienzan o martis 21 d’octubre e rematarán a finals de chunio de 2026.
Coronica de Luis Gayan
Google Sites
Report abuse