O Correllengua ye un carrera simbolica que se fa pa reivindicar a lengua catalana, en a cual se portia una flama encendida simbolicament en a montanya d’o Canigó, senyera d’a identidat catalana, y que iste anyo ha recorriu toz os territorios de parla catalana, dende Perpinyà, pasando por Catalunya, País Valencià, Illes Balears, y rematando en a ciudat sarda de l’Alguer. A carrera se podeba fer de tres maneras, caminando, correndo u en becicleta, dependendo d’as poibilidaz de participación popular de cada zona.

En o transcurso d’o suyo paso por a ciudat de Barcelona, a organización querió que estasen representadas atras lenguas minorizadas como l’amazig, o bretón, o euskera, l’asturiano, u mesmo l’aragonés. O Corrinche, siempre presto y dispuesto a espardir y divulgar o conoiximiento y a viveza d’a lengua aragonesa, i estió present y portando a flama por a carrera de Pau Claris con Gran Vía de Les Corts Catalanes enta Casp. Estió prou emocionant veyer a os companyers blincando con rasmia por ixas carreras con toz os participants dezaga. Cal dicir que O Corrinche no solo reivindica l’aragonés, sino tamién o catalán d’Aragón como lenguas propias a defender, divulgar y protecher, por o que en faciemos pancartas sinyaleras a o respective que dispertoron l’atención y a conformidat y admiración de toz os presents.

O evento se retardó una hora de l’horario previsto, por o  que habiemos de suspender as clases d’aragonés d’ixe día, pero toz estiemos d’alcuerdo en que a chornada reivindicativa lo mereixeba. L’anyo venient i tornaremos encara con más ganas, ilusión y participación activa.