O PEN Català organizó ro evento “O dreito a ra luenga, un dreito cultural” o 29 de septiembre en Barcelona en L’Antic Teatre de Barcelona como parti d’o programa cultural d’a Conferencia Mundial Mondiacult 2025 d’a Unesco.

L’acto chuntó a escritors, artistas, churistas y activistas ta charrar sobre os dreitos lingüisticos como una parti esencial d’a identidat cultural y d’a dignidat humana y o papel d’as ciudaz en a suya esfensa, con representación d’o Concello de Barcelona.

Se fació especial mención a ra necesidat d’esfensar as lenguas minoritarias y sin de poder politico, como ye o caso de l’aragonés.

Como eixemplo fabloron o escritor y activista cultural ABDWELI AYUB, d’o pueblo Uigur, enrestito por o gubierno chino, y  a profesora PIT-ROIG VINYALS, con una interesant enfiladura sobre unatra forma d’acotolamiento d’os pueblos a traviés de matar a suya luenga. Y ta rematar, as cancions d’o cantautor iraní ARGA ARAMNEJAD, enrestito por o gubierno d’o suyo propio país.

A presencia d’a luenga aragonesa se fació present con a poetisa  MARÍA PILAR BENÍTEZ, que recitó, de forma sobrebuena y emotiva, bels poemas suyos en luenga aragonesa, fendo referencia en o zaguer a ra realidat trilingüe d’Aragón. L’asociación O Corrinche participó como publico ta fer refirme a l’acto.

Estió una trobada con a ideya d’ubrir un debate global que clame l’atención sobre a situación d’as minorías lingüisticas europeas y de tot o mundo, con a intervención destacada de HELGE LUNGE, DIRECTOR d’ICORN.

Ye una important chornata centrata en os dreitos d’as lenguas minorizatas dentro d’un gran evento mundial, an la presencia d’a luenga aragonesa, ya sía a traviés d’O Corrinche, y en especial d’os poemas de María Pilar Benítez, sería totalment coherent con os obchectivos que se buscan.

L’acto remató en os chardins, compartindo un  pica-pica an podiemos intercambiar impresions con os fablans  d’as diferents luengas minorizatas que s’escuitoron en l’acto.