Embedded Files
O Sabado 15 de marzo de 2025 en l’Espai d'Inclusió i Formació Casc Antic, l’Asociación Cultural Colla de Charradors O Corrinche e o Centro Aragonés de Barcelona celebroron o Día Internacional d’a Muller con o seminario “A muller en a lengua aragonesa”, enfilau por María Pilar Benítez. En parabras d’ a mesma escritora, estudiadora, poeta e academica: “dica epocas reciens, a muller –salvo bellas excepcions– no ha teniu tiempo ni espacios ni condicions pa adedicar-se a o treballo intelectual e creyativo, como muito bien exposó a escritora Virginia Woolf en a suya obra A room of one's own. O esfuerzo fue mayor pa aquellas mullers que, amás, decidioron escribir en luengas minoritarias, minorizadas e no oficials, pos debeban sobreponer-se a una doble marginalidat, a d’o chenero e a d’o idioma por emplegar una luenga tamién menospreciada u censurada como ellas mesmas“.
Esperanza Gonzalo presenta a María Pilar Benítez
A ponent comencipió a charrada d’ o maitín con una breu pero completa exposición d’a historia d'a muller en a luenga aragonesa (1650-1970) con a proyección d’ imachens eslechitas consonant con o tema y, más que más, con l’obchetivo de visibilizar e valurar a trayectoria vital e a obra d’as mullers pioneras en o estudio de dita luenga e en a suya escritura literaria, siempre en relación con os feitos historicos, socials e culturals más importans que vivioron. Dimpués d’ a pausa ta fer bel café, a segunda parti d’ a sesión d’ o maitín estió adedicada a las primeras escritoras en aragonés en o sieglo XX (1970-1990). En a sesión de tardis, que prencipió malas que remató a chenta de grupo, se fació un taller literario en aragonés con a participación d’os asistents ta o seminario a partir de textos escritos por mullers.
Contino, un breu resumen d’ a trayectoria profesional e literaria de María Pilar Benítez.
María Pilar Benítez Marco ye docent, investigadera y escritora en castellano y aragonés. En as tres facetas i hai un compromiso con a tierra que la cunó de nina, el Pirineo, y con o suyo patrimonio cultural y lingüistico. Como docent, estió profesora d'Enseñanza Secundaria y d'a Universidat de Zaragoza. Imparte clases, asinasmesmo, en o Diploma d'Espezializazión en Filolochía Aragonesa.
En a suya faceta investigadera, se doctoró en Filolochía Ispanica con a tesi Contribución al estudio del habla del valle de Ansó. As suyas prencipals linias d'investigación son a filolochía aragonesa y os estudios sobre a muller.
Forma parte d'o consello asesor d'a revista Luenga & fablas y d'o comité editorial d'a revista Filanderas, revista interdisciplinar d'estudios feministas, y d'a colección Cosas nuestras de l'Instituto d'Estudios Altoaragoneses. Asinas mesmo ye asesora de l'Instituto d'Estudios Altoaragoneses en l'aria de Luenga y Literatura, y vicepresidenta de l'Academia Aragonesa d'a Luenga. Escritora en aragonés y en castellano, rezibió o Premio Miguel Labordeta 2017 d'o Gubierno d'Aragón por a obra Morfosintaxis humana. Ye autora d'os poemarios en luenga aragonesa Conchunzions (2016) y En o tuyo pro-nombre (2022).
Como Colla de Charradors O Corrinche, e como CAB, mirando de mantenir en a diaspora el calibo d’ a luenga e la cultura aragonesas, mos fazió muito goyo poder celebrar o día d'a muller con a presenzia de María Pilar Benítez, estudiosa de l’ aragonés e de raso embrecata con a presencia d'a muller en a cultura y en a luenga aragonesa.
Coronica d'Esperanza Gonzalo
Google Sites
Report abuse